khaak uchhaalo jo zamin par to falak par gir jaae — Sohail Azeemabadi

kyaa lutf hai aise jiine kaa jis ki na kisi ko parvaa ho
kis kaam kaa marnaa vo marnaa jis kaa ki kisi ko gham na huaa

vo raatein kaif mein Duubi vo teri pyaar ki baatein
nikal paDte hain aansu jab kabhi ham yaad karte hain

ai hasrat-e-dil go vasl huaa par shauq hamaaraa kam na huaa
jis se ki khalish kuchh aur baDhe vo zakhm huaa marham na huaa

vo kaun dil hai jahaan mein kah duun jise ki ye aap kaa nahin hai
ghazab to ye hai ki meraa dil hai magar miraa ham-navaa nahin hai

dimaagh ko kar rahaa huun raushan main daagh-e-dil ke jalaa rahaa huun
ab apni taarik zindagi kaa nayaa saraapaa banaa rahaa huun

kyaa gham hai jo ham gumnaam rahe tum to na magar badnaam hue
achchhaa hai ki mere marne par duniyaa mein miraa maatam na huaa

nikal ke khuld se un ko mili khilaafat-e-arz
nikaale jaane ki tohmat hamaare sar aai

be-zaar hain jo jazba-e-hubb-ul-vatani se
vo log kisi se bhi mohabbat nahin karte

de hausle ki daad ke ham tere gham mein aaj
baiThe hain mahfilon ko sajaae tire baghair

mere TuuTe hausle ke par nikalte dekh kar
us ne divaaron ko apni aur unchaa kar diyaa

rah-guzaar-e-maarifat tak ho rasaai yaa na ho
jazba--e-pur-shauq ki vaaraftagi kuchh kam nahin

ye bhi khud ko hausla dene kaa hiila hai ki main
ungliyon se likh rahaa huun chaar su laa-taqnatu