mujhe phunkne se pahle miraa dil nikaal lenaa — Anwar Mirzapuri

ai kaash hamaari qismat mein aisi bhi koi shaam aa jaae
ik chaand falak par niklaa ho ik chaand sar-e-baam aa jaae

mire ashk bhi hain is mein ye sharaab ubal na jaae
miraa jaam chhune vaale tiraa haath jal na jaae

abhi raat kuchh hai baaqi na uThaa naqaab saaqi
tiraa rind girte girte kahin phir sambhal na jaae

main nazar se pi rahaa huun ye samaan badal na jaae
na jhukaao tum nigaahein kahin raat Dhal na jaae

akelaa paa ke mujh ko yaad un ki aa to jaati hai
magar phir lauT kar jaati nahin main kaise so jaaun

main khush huun agar gulshan ke liye kuchh meraa lahu kaam aa jaae
lekin mujh ko Dar hai is kaa gulchin pe na ilzaam aa jaae

main baDaa ho gayaa huun magar bachpanaa
mere dil se kabhi bhi gayaa hi nahin

badalte vaqt ne badle mizaaj bhi kaise
tiri adaa bhi gai meraa baankpan bhi gayaa

'saif' andaaz-e-bayaan rang badal detaa hai
varna duniyaa mein koi baat nai baat nahin

ab miri baat jo maane to na le ishq kaa naam
tu ne dukh ai dil-e-naakaam bahut saa paayaa

bahut dilon ko sataayaa hai tu ne ai zaalim
mujhe ye Dar hai koi shakhs bad-duaa na kare

dil hi dil mein yaan mohabbat apnaa ghar karti rahi
ham rahe ghaafil vo sau TukDe jigar karti rahi