khatm hotaa hi nahin silsila tanhaai kaa — Arshad Jamal Sarim

dekh ai meri zabun-haali pe hansne vaale
vaqt ki dhuup ne kis darja nikhaaraa mujh ko

na jaane us ne khule aasmaan mein kyaa dekhaa
parinda phir se jahaan-e-qafas mein lauT aayaa

har ek shaakh pe viraaniyaan musallat hain
badan-darakht bhi goyaa hai aashiyaan-e-shab

zindagi tu bhi hamein vaise hi ik roz guzaar
jis tarah ham tujhe barson se guzaare hue hain

taa-umr tiraa naqsh-e-farozaan rahe mujh mein
ik zakhm ki surat mire maathe pe ubhar jaa

kyaa kahun kitnaa fuzun hai tere divaane kaa dukh
ik taraf jaane kaa gham hai ik taraf aane kaa dukh

gham hai na ab khushi hai na ummid hai na yaas
sab se najaat paae zamaane guzar gae

jab ki pahlu se yaar uThtaa hai
dard be-ikhtiyaar uThtaa hai

husn jalva dikhaa gayaa apnaa
ishq baiThaa rahaa udaas kahin

vufur-e-gham se machal rahe the dil-e-hazin mein hazaar shikve
ye kyaa khabar thi ki vaqt-e-pursish sukut mein Duub jaaungaa main

yahaan pe aah-o-fughaan dard-o-gham kaa naam nahin
miraa kalaam hai ye 'mir' kaa kalaam nahin

aashuftagi azal se mire aab-o-gil mein hai
kul lazzat-e-hayaat gham-e-jaan-gusil mein hai