libaas dekh ke itnaa hamein gharib na jaan — Azeem Haider Syed

ai shaam-e-hijr-e-yaar miri tu gavaahi de
main tere saath saath rahaa ghar nahin gayaa

isi liye to haar kaa huaa nahin malaal tak
vo mere saath saath thaa uruuj se zavaal tak

chaman ujaaDne vaalo tumhein khudaa samjhe
tumhein na aai hayaa phuul to hamaare gae

baazaar-e-aarzu mein kaTi jaa rahi hai umr
ham ko kharid le vo kharidaar chaahiye

tu ne bhi saare zakhm kisi taur sah liye
main bhi bichhaD ke ji hi liyaa mar nahin gayaa

dene vaale tu mujhe niind na de khvaab to de
mujh ko mahtaab se aage bhi kahin jaanaa hai

gham hai na ab khushi hai na ummid hai na yaas
sab se najaat paae zamaane guzar gae

husn jalva dikhaa gayaa apnaa
ishq baiThaa rahaa udaas kahin

jab ki pahlu se yaar uThtaa hai
dard be-ikhtiyaar uThtaa hai

do ghaDi niind ki mohlat hai vo gham taak mein hai
jis tarah saanp kaa bachcha koi paa-posh mein ho

muskuraane ki kyaa zarurat hai
aap yuun bhi udaas lagte hain

puchhte hain log mujh se kyon miraa naam-o-nasab
soch lein paighambaron se silsila mil jaaegaa