har vaqt kase rahte hain maaon ki piiTh se — Azhar Bakhsh Azhar

un ke khemon mein hain sab log kamar-basta magar
ham mein ghaflat ki hai bhar-maar khudaa khair kare

husn ki devi bani baiThi hain dil hai but-kada
chand muslim laDkiyon ne ham ko hindu kar diyaa

jab kamsin se ishq laDaanaa paDtaa hai
bachchon jaisaa paaTh paDhaanaa paDtaa hai

ik ghazal to mire haathon se misaali ho jaae
kaash ki tu miraa mahbub-e-khayaali ho jaae

tum chitaa in ki jalaao na karo dafn inhein
pyaar ke khat hain ye hindu yaa musalmaan nahin

tum ne dekhaa nahin hogaa kabhi aisaa qaatil
jo lahu chusne kaa jashn manaane nikle

gham hai na ab khushi hai na ummid hai na yaas
sab se najaat paae zamaane guzar gae

vo na aaegaa hamein maalum thaa is shaam bhi
intizaar us kaa magar kuchh soch kar karte rahe

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

tumhein fursat ho duniyaa se to ham se aa ke milnaa
hamaare paas fursat ke sivaa kyaa rah gayaa hai

zamaana mujh se judaa ho gayaa zamaana huaa
rahaa hai ab to bichhaDne ko mujh se tu baaqi

hasin khvaab ko sachchaa samajh rahaa hai koi
faqat gumaan ko duniyaa samajh rahaa hai koi