bataa rahaa hai jhaTaknaa tiri kalaai kaa — Azhar Faragh

ye nahin dekhte kitni hai riyaazat kis ki
log aasaan samajh lete hain aasaani ko

bahut se saanp the is ghaar ke dahaane par
dil is liye bhi khazaana shumaar hone lagaa

badal ke dekh chuki hai reaayaa saahib-e-takht
jo sar qalam nahin kartaa zabaan khinchtaa hai

bhanvar se ye jo mujhe baadbaan khinchtaa hai
zarur koi havaaon ke kaan khinchtaa hai

dalil us ke dariche ki pesh ki main ne
kisi ko patli gali se nahin nikalne diyaa

aisi ghurbat ko khudaa ghaarat kare
phuul bhejvaane ki gunjaaish na ho

ye khubi hai ki naa-khubi magar main
alag chaltaa huun apne kaarvaan se

tiraa khayaal de gayaa hai aasraa kahin kahin
tiraa firaaq hausle baDhaa gayaa kabhi kabhi

na dasht o dar se alag thaa na jangalon se judaa
vo apne shahr mein rahtaa thaa phir bhi tanhaa thaa

zaraa si baat thi teraa bichhaDnaa
zaraa si baat se kyaa kuchh huaa hai

haath bhar duuri pe hai qismat ki chaabi aap ki
ek chhoTaa saa qadam aur kaamyaabi aap ki

tere firaaq ne ki zindagi ataa mujh ko
teraa visaal jo miltaa to mar gayaa hotaa