ek muddat se hain safar mein ham — Azhar Iqbal

ghuTan si hone lagi us ke paas jaate hue
main khud se ruuTh gayaa huun use manaate hue

ye kaifiyat hai meri jaan ab tujhe kho kar
ki ham ne khud ko bhi paayaa nahin bahut din se

ye pahlaa ishq hai tumhaaraa soch lo
mire liye ye raastaa nayaa nahin

har ek shakhs yahaan mahv-e-khvaab lagtaa hai
kisi ne ham ko jagaayaa nahin bahut din se

hai ab bhi bistar-e-jaan par tire badan ki shikan
main khud hi miTne lagaa huun use miTaate hue

na jaane khatm hui kab hamaari aazaadi
taalluqaat ki paabandiyaan nibhaate hue

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

miri tamannaa hai ab ke tum phir milo to ji bhar ke muskuraaein
ki dekhnaa hai ye raushni kaa safar bahut der baa'd jaa kar

safar mein aise kai marhale bhi aate hain
har ek moD pe kuchh log chhuT jaate hain

yuun to maujud apne ghar mein hai
aadmi mustaqil safar mein hai

thaa kisi gum-karda-e-manzil kaa naqsh-e-be-sabaat
jis ko mir-e-kaarvaan kaa naqsh-e-paa samjhaa thaa mein

jab thi manzil nazar mein to rasta thaa ek
gum hui hai jo manzil to raste bahut