har ek shakhs yahaan mahv-e-khvaab lagtaa hai — Azhar Iqbal

ghuTan si hone lagi us ke paas jaate hue
main khud se ruuTh gayaa huun use manaate hue

ye kaifiyat hai meri jaan ab tujhe kho kar
ki ham ne khud ko bhi paayaa nahin bahut din se

ye pahlaa ishq hai tumhaaraa soch lo
mire liye ye raastaa nayaa nahin

hai ab bhi bistar-e-jaan par tire badan ki shikan
main khud hi miTne lagaa huun use miTaate hue

ek muddat se hain safar mein ham
ghar mein rah kar bhi jaise beghar se

na jaane khatm hui kab hamaari aazaadi
taalluqaat ki paabandiyaan nibhaate hue

mere khvaabon ke jharokon ko sajaate rahiye
na sahi vasl magar yaad to aate rahiye

hasin khvaab ko sachchaa samajh rahaa hai koi
faqat gumaan ko duniyaa samajh rahaa hai koi

kunein ki samt bulaa le na koi khvaab mujhe
main apne baap kaa sab se hasin beTaa huun

chand yaadein hain chand sapne hain
apne hisse mein aur kyaa hai ji

aap aae hain haal puchhaa hai
ham ne aise bhi khvaab dekhe hain

main ne ye soch ke boe nahin khvaabon ke darakht
kaun jangal mein uge peD ko paani degaa