ba-vaqt-e-shaam samundar mein gir gayaa suraj — Azhar Naiyyar

thi us ki band muTThi mein chiTThi dabi hui
jo shakhs thaa train ke niche kaTaa huaa

chaahaa hai jis kaa saaya shajar vo babul hai
qismat mein mere aaj bhi saDkon ki dhuul hai

dil khaak huaa pyaar ki is aag mein jal kar
aur jhaank ke us ne kabhi andar nahin dekhaa

tum bahr-e-mohabbat ke kinaare pe khaDe the
tum ne miri aankhon mein samundar nahin dekhaa

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

vo na aaegaa hamein maalum thaa is shaam bhi
intizaar us kaa magar kuchh soch kar karte rahe

gham hai na ab khushi hai na ummid hai na yaas
sab se najaat paae zamaane guzar gae

tumhein fursat ho duniyaa se to ham se aa ke milnaa
hamaare paas fursat ke sivaa kyaa rah gayaa hai

zamaana mujh se judaa ho gayaa zamaana huaa
rahaa hai ab to bichhaDne ko mujh se tu baaqi

main jis mein rah na sakaa ji-huzuriyon ke sabab
ye aadmi hai usi kaamyaab mausam kaa