jis ko chalnaa hai chale rakht-e-safar baandhe hue — Aziz Tamannai

vahin bahaar-ba-kaf qaafile lapak ke chale
jahaan jahaan tire naqsh-e-qadam ubharte rahe

ab kaun si mataa-e-safar dil ke paas hai
ik raushani-e-subh thi vo bhi udaas hai

ye gham nahin ki mujh ko jaagnaa paDaa hai umr bhar
ye ranj hai ki mere saare khvaab koi le gayaa

un ko hai daavaa-e-asihaai
jo nahin jaante shifaa kyaa hai

mil hi jaaegi kabhi manzil-e-maqsud-e-sahar
shart ye hai ki safar karte raho shaam ke saath

baaqi abhi qafas mein hai ahl-e-qafas ki yaad
bikhre paDe hain baal kahin aur par kahin

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

yuun to maujud apne ghar mein hai
aadmi mustaqil safar mein hai

safar mein aise kai marhale bhi aate hain
har ek moD pe kuchh log chhuT jaate hain

miri tamannaa hai ab ke tum phir milo to ji bhar ke muskuraaein
ki dekhnaa hai ye raushni kaa safar bahut der baa'd jaa kar

yaar bhi raah ki divaar samajhte hain mujhe
main samajhtaa thaa mire yaar samajhte hain mujhe

makharab-e-kaar hui josh mein khud ujlat-e-kaar
pichhe haT jaaegi manzil mujhe maalum na thaa