un ko hai daavaa-e-asihaai — Aziz Tamannai

jis ko chalnaa hai chale rakht-e-safar baandhe hue
ham jahaan-gasht hain uTThe hain kamar baandhe hue

vahin bahaar-ba-kaf qaafile lapak ke chale
jahaan jahaan tire naqsh-e-qadam ubharte rahe

ab kaun si mataa-e-safar dil ke paas hai
ik raushani-e-subh thi vo bhi udaas hai

ye gham nahin ki mujh ko jaagnaa paDaa hai umr bhar
ye ranj hai ki mere saare khvaab koi le gayaa

mil hi jaaegi kabhi manzil-e-maqsud-e-sahar
shart ye hai ki safar karte raho shaam ke saath

baaqi abhi qafas mein hai ahl-e-qafas ki yaad
bikhre paDe hain baal kahin aur par kahin

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

kyon tasavvur mein ji rahaa huun main
jab haqiqat mein mar hi jaanaa hai

duniyaa gharib jaan ke hansti thi 'mir' par
'iqbaal' mujh pe aise ye duniyaa hansi ki bas

ijz-o-niyaaz apnaa apni taraf hai saaraa
is musht-e-khaak ko ham masjud jaante hain

na jaane us ne khule aasmaan mein kyaa dekhaa
parinda phir se jahaan-e-qafas mein lauT aayaa

vo kuchh muskuraanaa vo kuchh jheinp jaanaa
javaani adaaein sikhaati hain kyaa kyaa