jaane kyuun un se milte rahte hain — Baqar Mehdi

is shahr mein hai kaun hamaaraa tire sivaa
ye kyaa ki tu bhi apnaa kabhi ham-navaa na ho

jaane kin mushkilon se jiite hain
kyaa karein koi mehrbaan na rahaa

ham milein yaa na milein phir bhi kabhi khvaabon mein
muskuraati hui aaeingi hamaari baatein

aisi begaanagi nahin dekhi
ab kisi kaa koi yahaan na rahaa

faasle aise ki ik umr mein tai ho na sakein
qurbatein aisi ki khud mujh mein janam hai us kaa

sailaab-e-zindagi ke sahaare baDhe chalo
saahil pe rahne vaalon kaa naam-o-nishaan nahin

gham hai na ab khushi hai na ummid hai na yaas
sab se najaat paae zamaane guzar gae

nahin nahin main bahut khush rahaa huun tere baghair
yaqin kar ki ye haalat abhi abhi hui hai

in aablon se paanv ke ghabraa gayaa thaa main
ji khush huaa hai raah ko pur-khaar dekh kar

tumhaare hisse ke jitne bhi gham hain main le luun
mire nasib ki har ik khushi mile tum ko

hamein shikva nahin ik dusre se
manaanaa chaahiye is par khushi kyaa

raah aasaan dekh kar sab khush the phir main ne kahaa
soch liije ek andaaz-e-nazar meraa bhi hai