rahegaa kis kaa hissa beshtar mere miTaane mein — Barq Dehlvi

din-raat paDaa rahtaa huun darvaaze pe apne
is gham mein ki koi kabhi aataa thaa idhar se

shab-e-furqat nazar aate nahin aasaar-e-sahar
itni zulmat hai rukh-e-shama pe bhi nuur nahin

sar-ba-kaf hind ke jaan-baaz-e-vatan laDte hain
tegh-e-nau le saf-e-dushman mein ghuse paDte hain

tere didaar se main aankh uThaaun kyunkar
zulf se paa-e-nazar halqa-e-zanjir mein hai

ret par ik nishaan hai shaayad
ye hamaaraa makaan hai shaayad

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

vo na aaegaa hamein maalum thaa is shaam bhi
intizaar us kaa magar kuchh soch kar karte rahe

ghulaami mein na kaam aati hain shamshirein na tadbirein
jo ho zauq-e-yaqin paidaa to kaT jaati hain zanjirein

pyaaso raho na dasht mein baarish ke muntazir
maaro zamin pe paanv ki paani nikal paDe

gham hai na ab khushi hai na ummid hai na yaas
sab se najaat paae zamaane guzar gae