raah-rau bach ke chal darakhton se — Ejaz Warsi

aap aae hain haal puchhaa hai
ham ne aise bhi khvaab dekhe hain

main us ke aib us ko bataataa bhi kis tarah
vo shakhs aaj tak mujhe tanhaa nahin milaa

chaDhte suraj ki mudaaraat se pahle 'ejaaz'
soch lo kitne charaagh us ne bujhaae honge

barson mein bhi chhu jaae kisi ko to ghanimat
khushbu-e-vafaa yaaro baDi sust-qadam hai

ai sang-e-aastaan mire sajdon ki laaj rakh
aayaa huun e'tiraaf-e-shikast-e-khudi liye

darbaanon tak ke chehre raunat se maskh hain
dast-e-talab liye hue phir bhi khaDe hain log

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

miri tamannaa hai ab ke tum phir milo to ji bhar ke muskuraaein
ki dekhnaa hai ye raushni kaa safar bahut der baa'd jaa kar

safar mein aise kai marhale bhi aate hain
har ek moD pe kuchh log chhuT jaate hain

yaad aai hai to phir TuuT ke yaad aai hai
koi guzri hui manzil koi bhuli hui dost

dimaagh un ke tajassus mein jism ghar mein rahaa
main apne ghar hi mein rahte hue safar mein rahaa

yuun to maujud apne ghar mein hai
aadmi mustaqil safar mein hai