aap aae hain haal puchhaa hai — Ejaz Warsi

main us ke aib us ko bataataa bhi kis tarah
vo shakhs aaj tak mujhe tanhaa nahin milaa

raah-rau bach ke chal darakhton se
dhuup dushman nahin hai saae hain

chaDhte suraj ki mudaaraat se pahle 'ejaaz'
soch lo kitne charaagh us ne bujhaae honge

barson mein bhi chhu jaae kisi ko to ghanimat
khushbu-e-vafaa yaaro baDi sust-qadam hai

ai sang-e-aastaan mire sajdon ki laaj rakh
aayaa huun e'tiraaf-e-shikast-e-khudi liye

darbaanon tak ke chehre raunat se maskh hain
dast-e-talab liye hue phir bhi khaDe hain log

mere khvaabon ke jharokon ko sajaate rahiye
na sahi vasl magar yaad to aate rahiye

hasin khvaab ko sachchaa samajh rahaa hai koi
faqat gumaan ko duniyaa samajh rahaa hai koi

kunein ki samt bulaa le na koi khvaab mujhe
main apne baap kaa sab se hasin beTaa huun

jab se ik khvaab ki taabir mili hai mujh ko
main har ik khvaab ki taabir se ghabraataa huun

kar rahe hain zindagi mein maa'naviyyat ki talaash
khvaab mein Duubaa huaa taalaab sahraa aur main

ai mujhe khvaab dikhaate hue logo sun lo
meraa dukh ye hai koi khvaab nahin bhultaa main