chaDhte suraj ki mudaaraat se pahle 'ejaaz' — Ejaz Warsi

aap aae hain haal puchhaa hai
ham ne aise bhi khvaab dekhe hain

main us ke aib us ko bataataa bhi kis tarah
vo shakhs aaj tak mujhe tanhaa nahin milaa

raah-rau bach ke chal darakhton se
dhuup dushman nahin hai saae hain

barson mein bhi chhu jaae kisi ko to ghanimat
khushbu-e-vafaa yaaro baDi sust-qadam hai

ai sang-e-aastaan mire sajdon ki laaj rakh
aayaa huun e'tiraaf-e-shikast-e-khudi liye

darbaanon tak ke chehre raunat se maskh hain
dast-e-talab liye hue phir bhi khaDe hain log

jinhein ye fikr nahin sar rahe rahe na rahe
vo sach hi kahte hain jab bolne pe aate hain

vo na aaegaa hamein maalum thaa is shaam bhi
intizaar us kaa magar kuchh soch kar karte rahe

mere andar koi taktaa rahaa rasta us kaa
main hamesha ke liye rah gai chilman ban ke

lagaae piiTh baiThi sochti rahti thi main jis se
vahi divaar lafzon ki achaanak aa rahi mujh par

sarhadein achchhi ki sarhad pe na ruknaa achchhaa
sochiye aadmi achchhaa ki parinda achchhaa

jaane kyaa Thaan ke uThtaa huun nikalne ke liye
jaane kyaa soch ke darvaaze se lauT aataa huun