tumhaare sang hi mujh ko mili parvaaz ki himmat — Erum Zehra

dil ki dharti par vafaa kaa moajiza rakkhaa gayaa
phir dilon ke darmiyaan kyuun faasla rakkhaa gayaa

meri sochon par usi ki dastaras hone lagi
us ki saari jiit meri maat se mansub hai

sochaa hi nahin tum ne zaraa baat se pahle
kyon shart rakhi tum ne mulaaqaat se pahle

is baar to munsif se koi chuuk hui hai
kyon jiit kaa elaan huaa maat se pahle

mire alfaaz mein us ki halaavat ho gai daakhil
mire lahje mein shaamil ho gai hai guftugu us ki

hamaare zarf kaa logon ne imtihaan liyaa
zaraa si baat kaa dil mein malaal kyaa rakhte

harf saare bol uTThein jab bhi main likhne lagun
ab koi jazba miraa mahv-e-duaa lagtaa nahin

ye aur baat ki kam-hausla to main bhi thi
magar ye sach hai use pahle main ne chaahaa thaa

tamaam umr azaabon kaa silsila to rahaa
ye kam nahin hamein jiine kaa hausla to rahaa

vaqt ki gardishon kaa gham na karo
hausle mushkilon mein palte hain

mat baiTh aashiyaan mein paron ko sameT kar
kar hausla kushaada fazaa mein uDaan kaa

ye kah ke dil ne mire hausle baDhaae hain
ghamon ki dhuup ke aage khushi ke saae hain