harf saare bol uTThein jab bhi main likhne lagun — Baharunnisa Bahar

viraan zindagi ke ye lamhe ajiib hain
bazm-e-tarab mein dhuum hai furqat dhamaal se

ye zakhm-e-anaa kaafi hai ai yusuf-e-dauraan
is chashm-e-zulekhaa ko tu ghamnaak na karnaa

munjamid ho zindagi mein jab kabhi shahr-e-khayaal
phir charaagh-e-dil se us ko jagmagaanaa chaahiye

ghaayal vajud soch ki baisaakhiyaan liye
milne chalaa hai guzre hue maah-o-saal se

ashk ke abr-e-ravaan mein DhunDhti huun main tujhe
aas ki in titliyon ko bhi Thikaanaa chaahiye

havaa hai ret hai dasht-e-vafaa hai
ruton ko aataa jaataa dekhti huun

idhar udhar ke sunaae hazaar afsaane
dilon ki baat sunaane kaa hausla na huaa

haqiqatein to aTal hain badal nahin saktin
magar kisi ki tasalli se hausla huaa hai

zakhm detaa hai har koi 'tanhaa'
hausla bhi diyaa kare koi

fazaa mein guunj rahi hain kahaaniyaan gham ki
hamin ko hausla-e-sharh-e-daastaan na rahaa

nahin maalum kitne ho chuke hain imtihaan ab tak
magar tere vafaadaaron ki himmat hai javaan ab tak

lazzat-e-gham to bakhsh di us ne
hausle bhi 'adam' diye hote