ye kah ke dil ne mire hausle baDhaae hain — Mahirul Qadri

aql kahti hai dobaara aazmaanaa jahl hai
dil ye kahtaa hai fareb-e-dost khaate jaaiye

agar khamosh rahun main to tu hi sab kuchh hai
jo kuchh kahaa to tiraa husn ho gayaa mahdud

naqaab-e-rukh uThaayaa jaa rahaa hai
vo nikli dhuup saayaa jaa rahaa hai

ik baar tujhe aql ne chaahaa thaa bhulaanaa
sau baar junun ne tiri tasvir dikhaa di

yahi hai zindagi apni yahi hai bandagi apni
ki un kaa naam aayaa aur gardan jhuk gai apni

ibtidaa vo thi ki jiine ke liye martaa thaa main
intihaa ye hai ki marne ki bhi hasrat na rahi

gham hai na ab khushi hai na ummid hai na yaas
sab se najaat paae zamaane guzar gae

husn jalva dikhaa gayaa apnaa
ishq baiThaa rahaa udaas kahin

jab ki pahlu se yaar uThtaa hai
dard be-ikhtiyaar uThtaa hai

us pe qurbaan ki jis ne tiri aavaaz suni
sadqe us aankh ke jis ne tiraa jalva dekhaa

vo dard huun koi chaara nahin hai jis kaa kahin
vo zakhm huun ki hai dushvaar indimaal miraa

ye zindagi hai apni kabhi khush kabhi udaas
is kashmakash se mujh ko khudaayaa rihaai de