phir usi qabr ke baraabar se — Fahmi Badayuni

kaash vo raaste mein mil jaae
mujh ko munh pher kar guzarnaa hai

khuun pilaa kar jo sher paalaa thaa
us ne circus mein naukri kar li

pareshaan hai vo jhuTaa ishq kar ke
vafaa karne ki naubat aa gai hai

Tahalte phir rahe hain saare ghar mein
tiri khaali jagah ko bhar rahe hain

aaj paivand ki zarurat hai
ye sazaa hai rafu na karne ki

puchh lete vo bas mizaaj miraa
kitnaa aasaan thaa ilaaj miraa

pyaaso raho na dasht mein baarish ke muntazir
maaro zamin pe paanv ki paani nikal paDe

vo jab bhi aayaa bahut tez baarishon jaisaa
vo jis ne chaahaa mujhe surmai ghaTaa rakhnaa

be-abr rind piite nahin vaaizo sharaab
karte hain ye gunaah bhi rahmat ke zor par

baarish jise 'mahmud' samajhtaa hai zamaana
insaan ke kirdaar pe rote hain farishte

aa ki mazbut karein pyaar ki buniyaadon ko
ghar shikasta ho to barsaat mein baT jaataa hai

chaman mein shab ko ghiraa abr-e-nau-bahaar rahaa
huzur aap kaa kyaa kyaa na intizaar rahaa