dil kaa mire parinda tumhaare qafas mein thaa — Faisal Qadri Gunnauri

us ne jab se haath pakaDnaa chhoD diyaa
tab se ham ne saath mein chalnaa chhoD diyaa

tum jo chaaho vo karte phirte ho
saari paabandiyaan hami par hain

teraa aaina kah rahe hain mujhe
meri tasvir dekhne vaale

ab zindagi se koi bhi shikva nahin mujhe
tu mil gayaa to koi tamanna nahin mujhe

lauT kar aae vo viraana-e-hasti dekhe
jis ki khvaahish thi ki barbaad kiyaa jaae mujhe

ai chaaraagar ye kaisi hain davaaein
miri taklif baDhti jaa rahi hai

main baDaa ho gayaa huun magar bachpanaa
mere dil se kabhi bhi gayaa hi nahin

'saif' andaaz-e-bayaan rang badal detaa hai
varna duniyaa mein koi baat nai baat nahin

badalte vaqt ne badle mizaaj bhi kaise
tiri adaa bhi gai meraa baankpan bhi gayaa

sunte hi ho ke ham-aaghosh kahaa hans ke tujhe
dard-e-dil ki hai davaa aur bhi darkaar ki bas

koi taaza lagaao zakhm dil par
puraani ye nishaani ho rahi hai

'maasum' ajab hai haal-e-chaman har shoale kaa yahaan badlaa hai chalan
shaakhon ko jalaayaa jaataa hai taair ko sataayaa jaataa hai