mujhe Thukraa diyaa tu ne faqat shaair samajh kar aaj — Fakhr Abbas

jab se us ki aankh mein aansu dekhe hain
tab se mujh ko paani se Dar lagtaa hai

ai mohabbat mujh ko aisaa hausla khairaat kar
us ko baazu se pakaD kar kah sakun ki baat kar

main shahr mein tanhaa hi use DhunD rahaa huun
jo sab se chhupaai thi vahi chiiz gumi hai

vo chaahtaa hai mahina kaTe na jaldi se
kiraae-daar ke dukh bhi ajiib hote hain

kabhi kabhi to mujhe daad itni milti hai
ki saare ghar kaa guzaara usi se hotaa hai

rasmon ko nahin pairon ki zanjir kiyaa
main ne jo mahsus kiyaa tahrir kiyaa

main baDaa ho gayaa huun magar bachpanaa
mere dil se kabhi bhi gayaa hi nahin

subh-saveraa daftar biivi bachche mahfil nindein raat
yaar kisi ko mushkil bhi hoti hai is aasaani par

totli umr mein jo bachcha zaraa mushfiq thaa
kuchh baDaa ho ke dahaane pe na pahunchaa aakhir

ik manzar mein peD the jin par chand kabutar baiThe the
ik bachche ki laash bhi thi jis ke kandhe par bastaa thaa

koi le le fauran us ke haath se ghubbaare saare
ek bachcha jaane kab se muskuraanaa chaahtaa hai

gayaa bachpan shabaab aayaa buDhaapaa aane vaalaa hai
magar main to abhi tak aap ko bachcha samajhtaa huun