aisi khushiyaan to kitaabon mein mileingi shaayad — Faryad Aazar

band ho jaataa hai kuuze mein kabhi dariyaa bhi
aur kabhi qatra samundar mein badal jaataa hai

main us ki baaton mein gham apnaa bhuul jaataa magar
vo shakhs rone lagaa khud hansaa hansaa ke mujhe

is tamaashe kaa sabab varna kahaan baaqi hai
ab bhi kuchh log hain zinda ki jahaan baaqi hai

subh hoti hai to daftar mein badal jaataa hai
ye makaan raat ko phir ghar mein badal jaataa hai

jo duur rah ke uDaataa rahaa mazaaq miraa
qarib aayaa to royaa gale lagaa ke mujhe

main jis mein rah na sakaa ji-huzuriyon ke sabab
ye aadmi hai usi kaamyaab mausam kaa

gham hai na ab khushi hai na ummid hai na yaas
sab se najaat paae zamaane guzar gae

nahin nahin main bahut khush rahaa huun tere baghair
yaqin kar ki ye haalat abhi abhi hui hai

ye roz-marra ke kuchh vaaqiaat-e-shaadi-o-gham
mire khudaa yahi insaan ki zindagaani hai

dasht-e-baaraan ki havaa se phir haraa saa ho gayaa
main faqat khushbu se us ki taaza-dam saa ho gayaa

main muskuraataa magar di na ashk ne mohlat
khushi jab ek mili saath gham hazaar mile

is liye vasl se inkaar hai ham jaan gae
ye na samjhe koi kyaa jald kahaa maan gae