nahin charaagh jalaaeinge ab kisi dar par — Fatima Mehru

tasviron par mat jaanaa
saali jhuTi hoti hain

ye ghalat-fahmiyon kaa mausam hai
apne dil ko sanbhaal kar rakhnaa

tire hijrat ke maare bastiyon se laD rahe hain
jinhein yaksar tire dil mein Thikaana chaahiye thaa

chhoD jaaeinge tujhe chaand ke charche sun kar
chaDhte suraj ke pujaari hain tire divaane

aur is se peshtar us ko bhulaa sakun yaksar
use main us ki tarah yaad aanaa chaahti huun

vo koh-e-qaaf kaa jaise makin ho gayaa hai
bichhaD ke aur ziyaada hasin ho gayaa hai

sabhi se jab mohabbat chaahte ho
mohabbat kyon nahin karte sabhi se

husn jalva dikhaa gayaa apnaa
ishq baiThaa rahaa udaas kahin

kyaa kahaa ishq jaavedaani hai!
aakhiri baar mil rahi ho kyaa

dil kaun hai ki us se kahein raaz-e-ishq ham
tere khayaal se bhi na ham guftugu karein

karo kaj jabin pe sar-e-kafan mire qaatilon ko gumaan na ho
ki ghurur-e-ishq kaa baankpan pas-e-marg ham ne bhulaa diyaa

sach ishq mein hain aashiq o maashuq baraabar
jo mushkil-e-majnun hai so hai mushkil-e-lailaa