tasviron par mat jaanaa — Fatima Mehru

ye ghalat-fahmiyon kaa mausam hai
apne dil ko sanbhaal kar rakhnaa

nahin charaagh jalaaeinge ab kisi dar par
ham aap apni mohabbat mazaar kar leinge

tire hijrat ke maare bastiyon se laD rahe hain
jinhein yaksar tire dil mein Thikaana chaahiye thaa

chhoD jaaeinge tujhe chaand ke charche sun kar
chaDhte suraj ke pujaari hain tire divaane

aur is se peshtar us ko bhulaa sakun yaksar
use main us ki tarah yaad aanaa chaahti huun

vo koh-e-qaaf kaa jaise makin ho gayaa hai
bichhaD ke aur ziyaada hasin ho gayaa hai

kyon tasavvur mein ji rahaa huun main
jab haqiqat mein mar hi jaanaa hai

apni anaa ki aaj bhi taskin ham ne ki
ji bhar ke us ke husn ki tauhin ham ne ki

paDosi piTte hain jab dariche aur darvaaze
main Thumri chheD detaa huun taraanaa chhoD detaa huun

main ghar ko phunk rahaa thaa baDe yaqin ke saath
ki teri raah mein pahlaa qadam uThaanaa thaa

pahaaD bhaanp rahaa thaa mire iraade ko
vo is liye bhi ki tesha mujhe uThaanaa thaa

raston ke pech-o-kham ne kahin aur laa diyaa
jaanaa hamein jahaan thaa ye manzil nahin hai vo