chhoD jaaeinge tujhe chaand ke charche sun kar — Fatima Mehru

tasviron par mat jaanaa
saali jhuTi hoti hain

ye ghalat-fahmiyon kaa mausam hai
apne dil ko sanbhaal kar rakhnaa

nahin charaagh jalaaeinge ab kisi dar par
ham aap apni mohabbat mazaar kar leinge

tire hijrat ke maare bastiyon se laD rahe hain
jinhein yaksar tire dil mein Thikaana chaahiye thaa

aur is se peshtar us ko bhulaa sakun yaksar
use main us ki tarah yaad aanaa chaahti huun

vo koh-e-qaaf kaa jaise makin ho gayaa hai
bichhaD ke aur ziyaada hasin ho gayaa hai

vo chaand hai to aks bhi paani mein aaegaa
kirdaar khud ubhar ke kahaani mein aaegaa

phaili hui hai chaandni ehsaas mein mire
ye kaun meri zaat ke andar utar gayaa

kitnaa pyaaraa lagtaa hai
hotaa hai jab puuraa chaand

eid kaa chaand tum ne dekh liyaa
chaand ki eid ho gai hogi

agar aa jaae pahlu mein 'qamar' vo maah-e-kaamil bhi
do aalam jagmagaa uTTheinge dohri chaandni hogi

puchhaa jo un se chaand nikaltaa hai kis tarah
zulfon ko rukh pe Daal ke jhaTkaa diyaa ki yuun