mire vajud ko parchhaaiyon ne toD diyaa — Fazil Jamili

misaal-e-shama jalaa huun dhuaan saa bikhraa huun
main intizaar ki har kaifiyat se guzraa huun

safed-poshi-e-dil kaa bharam bhi rakhnaa hai
tiri khushi ke liye teraa gham bhi rakhnaa hai

ab kaun jaa ke saahib-e-mimbar se ye kahe
kyuun khuun pi rahaa hai sitamgar sharaab pi

puraane yaar bhi aapas mein ab nahin milte
na jaane kaun kahaan dil lagaa ke baiTh gayaa

zindagi ho to kai kaam nikal aate hain
yaad aaungaa kabhi main bhi zarurat mein use

tum kabhi ek nazar meri taraf bhi dekho
ik tavaqqo hi to hai koi guzaarish to nahin

gham hai na ab khushi hai na ummid hai na yaas
sab se najaat paae zamaane guzar gae

jab ki pahlu se yaar uThtaa hai
dard be-ikhtiyaar uThtaa hai

husn jalva dikhaa gayaa apnaa
ishq baiThaa rahaa udaas kahin

chalaa hai chhoD ke tanhaa kidhar tasavvur-e-yaar
shab-e-firaaq mein thaa tujh se mashghala dil kaa

kyaa koi dil lagaa ke kahe sher ai 'qalaq'
naaqadri-e-sukhan se hain ahl-e-sukhan udaas

aalaam-e-rozgaar ko aasaan banaa diyaa
jo gham huaa use gham-e-jaanaan banaa diyaa