safed-poshi-e-dil kaa bharam bhi rakhnaa hai — Fazil Jamili

misaal-e-shama jalaa huun dhuaan saa bikhraa huun
main intizaar ki har kaifiyat se guzraa huun

ab kaun jaa ke saahib-e-mimbar se ye kahe
kyuun khuun pi rahaa hai sitamgar sharaab pi

puraane yaar bhi aapas mein ab nahin milte
na jaane kaun kahaan dil lagaa ke baiTh gayaa

zindagi ho to kai kaam nikal aate hain
yaad aaungaa kabhi main bhi zarurat mein use

mire liye na ruk sake to kyaa huaa
jahaan kahin Thahar gae ho khush raho

tum kabhi ek nazar meri taraf bhi dekho
ik tavaqqo hi to hai koi guzaarish to nahin

gham hai na ab khushi hai na ummid hai na yaas
sab se najaat paae zamaane guzar gae

husn jalva dikhaa gayaa apnaa
ishq baiThaa rahaa udaas kahin

jab ki pahlu se yaar uThtaa hai
dard be-ikhtiyaar uThtaa hai

tanhaaiyon mein aati rahi jab bhi us ki yaad
saaya saa ik qarib mire Doltaa rahaa

unhin ki hasrat-e-rafta ki yaadgaar huun main
jo log rah gae tanhaa bhari bahaaron mein

yuun hi ham dard apnaa kho rahe hain
yahi ronaa hai ham kyuun ro rahe hain