tanhaaiyon mein aati rahi jab bhi us ki yaad — Zaheer Kashmiri

aah ye mahki hui shaamein ye logon ke hujum
dil ko kuchh biiti hui tanhaaiyaan yaad aa gaiin

hamein khabar hai ki ham hain charaagh-e-aakhir-e-shab
hamaare baa'd andheraa nahin ujaalaa hai

sirat na ho to aariz-o-rukhsaar sab ghalat
khushbu uDi to phuul faqat rang rah gayaa

koi dastak koi aahaT na shanaasaa aavaaz
khaak uDti hai dar-e-dil pe bayaabaan ki tarah

farz barson ki ibaadat kaa adaa ho jaise
but ko yuun puuj rahe hain ki khudaa ho jaise

kul kaaenaat fikr se aazaad ho gai
insaan misaal-e-dast-e-tah-e-sang rah gayaa

gham hai na ab khushi hai na ummid hai na yaas
sab se najaat paae zamaane guzar gae

husn jalva dikhaa gayaa apnaa
ishq baiThaa rahaa udaas kahin

jab ki pahlu se yaar uThtaa hai
dard be-ikhtiyaar uThtaa hai

koi dastak koi aahaT na sadaa hai koi
duur tak ruuh mein phailaa huaa sannaaTaa hai

har ek mausam mein raushni si bikherte hain
tumhaare gham ke charaagh meri udaasiyon mein

be-sadaa kyuun guzarte ho aavaaz do
ab bhi kuchh log andar makaanon mein hain