kahin ye tark-e-mohabbat ki ibtidaa to nahin — Hafeez Hoshiarpuri

aah marg-e-aadmi par aadmi roe bahut
koi bhi royaa na marg-e-aadamiyyat ke liye

tiri talaash mein jab ham kabhi nikalte hain
ik ajnabi ki tarah raaste badalte hain

ham ko manzil ne bhi gumraah kiyaa
raaste nikle kai manzil se

dosti aam hai lekin ai dost
dost miltaa hai baDi mushkil se

zamaane bhar ke gham yaa ik tiraa gham
ye gham hogaa to kitne gham na honge

mohabbat karne vaale kam na honge
tiri mahfil mein lekin ham na honge

sabhi se jab mohabbat chaahte ho
mohabbat kyon nahin karte sabhi se

kisi se ishq apnaa kyaa chhupaaein
mohabbat Tapki paDti hai nazar se

husn jalva dikhaa gayaa apnaa
ishq baiThaa rahaa udaas kahin

mai-kade ko jaa ke dekh aauun ye hasrat dil mein hai
zaahid us miTTi ki ulfat meri aab-o-gil mein hai

butaan-e-sarv-qaamat ki mohabbat mein na phal paayaa
riyaazat jin pe ki barson vo nakhl-e-be-samar nikle

harf-e-dushnaam se yuun us ne navaazaa ham ko
ye malaamat hi mohabbat kaa sila ho jaise