mohabbat karne vaale kam na honge — Hafeez Hoshiarpuri

tiri talaash mein jab ham kabhi nikalte hain
ik ajnabi ki tarah raaste badalte hain

ham ko manzil ne bhi gumraah kiyaa
raaste nikle kai manzil se

dosti aam hai lekin ai dost
dost miltaa hai baDi mushkil se

zamaane bhar ke gham yaa ik tiraa gham
ye gham hogaa to kitne gham na honge

agar tu ittifaaqan mil bhi jaae
tiri furqat ke sadme kam na honge

aah marg-e-aadmi par aadmi roe bahut
koi bhi royaa na marg-e-aadamiyyat ke liye

bil-aakhir thak haar ke yaaro ham ne bhi taslim kiyaa
apni zaat se ishq hai sachchaa baaqi sab afsaane hain

sabhi se jab mohabbat chaahte ho
mohabbat kyon nahin karte sabhi se

na paak hogaa kabhi husn o ishq kaa jhagDaa
vo qissa hai ye ki jis kaa koi gavaah nahin

shama bujh kar rah gai parvaana jal kar rah gayaa
yaadgaar-e-husn-o-ishq ik daagh dil par rah gayaa

husn jalva dikhaa gayaa apnaa
ishq baiThaa rahaa udaas kahin

sau fasaad ek ishq mein uTThe
boyaa ik tukhm uge hazaar darakht