ishq mein dil kaa ye manzar dekhaa — Haneef Akhgar

puchhti rahti hai jo qaisar-o-kisraa kaa mizaaj
shaan ye khaak-nashinon mein kahaan se aai

hasin surat hamein hamesha hasin hi maalum kyuun na hoti
hasin andaaz-e-dil-navaazi hasin-tar naaz barhami kaa

kushta-e-zabt-e-fughaan naghma-e-be-saaz-o-sadaa
uf vo aansu jo lahu ban ke Tapaktaa hogaa

koi saaghar pe saaghar pi rahaa hai koi tishna hai
murattab is tarah aain-e-mai-khaana nahin hotaa

jo musaafir bhi tire kuche se guzraa hogaa
apni nazron ko bhi divaar samajhtaa hogaa

har taraf hain khaana-barbaadi ke manzar be-shumaar
kuchh Thikaana hai bhalaa is jazba-e-taamir kaa

sabhi se jab mohabbat chaahte ho
mohabbat kyon nahin karte sabhi se

husn jalva dikhaa gayaa apnaa
ishq baiThaa rahaa udaas kahin

kyaa kohkan ki koh-kani kyaa junun-e-qais
vaadi-e-ishq mein ye maqaam ibtidaa ke hain

tire hi pyaar ne kyaa dil ko vusatein bakhshin
ki gham mein ghair ke dil be-qaraar hotaa hai

mohabbat rang de jaati hai jab dil dil se miltaa hai
magar mushkil to ye hai dil baDi mushkil se miltaa hai

kamaal-e-ishq to dekho vo aa gae lekin
vahi hai shauq vahi intizaar baaqi hai