har zakhm-e-kohnaa vaqt ke marham ne bhar diyaa — Hanif Tarin

paani ne jise dhuup ki miTTi se banaayaa
vo daaera-e-rabt bigaDne ke liye thaa

rishte naate TuuTe phuTe lage hain
jab bhi apnaa saaya saath nahin hotaa

basti ke hassaas dilon ko chubhtaa hai
sannaaTaa jab saari raat nahin hotaa

ret par jalte hue dekh saraabon ke charaagh
apne bikhraav mein vo aur sanvar jaataa hai

mahfil mein phuul khushiyon ke jo baanTtaa rahaa
tanhaai mein milaa to bahut hi udaas thaa

jin kaa yaqin raah-e-sukun ki asaas hai
vo bhi gumaan-e-dasht mein mujh ko phanse lage

gham hai na ab khushi hai na ummid hai na yaas
sab se najaat paae zamaane guzar gae

husn jalva dikhaa gayaa apnaa
ishq baiThaa rahaa udaas kahin

jab ki pahlu se yaar uThtaa hai
dard be-ikhtiyaar uThtaa hai

gham-gusaari ke liye ab nahin aataa hai koi
zakhm bhar jaane kaa imkaan na huaa thaa so huaa

dard ki dhuup mein sahraa ki tarah saath rahe
shaam aai to lipaT kar hamein divaar kiyaa

yuun bhi mili hai mujh ko mire zabt-e-gham ki daad
aksar vo sar jhukaae hue muskuraae hain