mohabbatein to faqat intihaaein maangti hain — Hasan Abbas Raza

dhaDakti qurbaton ke khvaab se jaage to jaanaa
zaraa se vasl ne kitnaa akelaa kar diyaa hai

judaai ki ruton mein suratein dhundlaane lagti hain
so aise mausamon mein aaina dekhaa nahin karte

kyaa shakhs thaa uDaataa rahaa umr bhar mujhe
lekin havaa se haath milaane nahin diyaa

savaal ye nahin mujh se hai kyuun gurezaan vo
savaal ye hai ki kyuun jism o jaan se baahar hai

bachchon ke saath aaj use dekhaa to dukh huaa
un mein se koi ek bhi maan par nahin gayaa

sivaa tere har ik shai ko haTaa denaa hai manzar se
aur is ke baa'd khud ko be-sar-o-saamaan karnaa hai

sabhi se jab mohabbat chaahte ho
mohabbat kyon nahin karte sabhi se

husn jalva dikhaa gayaa apnaa
ishq baiThaa rahaa udaas kahin

saaz-e-ulfat chhiD rahaa hai aansuon ke saaz par
muskuraae ham to un ko bad-gumaani ho gai

tumhaare ishq mein kyaa kyaa na ikhtiyaar kiyaa
kabhi falak kaa kabhi ghair kaa vaqaar kiyaa

ishq huaa jab un ko paDhte dekhaa thaa
'mir' ki ghazlein dariyaa-ganj ke circle par

koi samjhaao unhein bahr-e-khudaa ai momino
us sanam ke ishq mein jo mujh ko samjhaate hain log