bachchon ke saath aaj use dekhaa to dukh huaa — Hasan Abbas Raza

dhaDakti qurbaton ke khvaab se jaage to jaanaa
zaraa se vasl ne kitnaa akelaa kar diyaa hai

judaai ki ruton mein suratein dhundlaane lagti hain
so aise mausamon mein aaina dekhaa nahin karte

kyaa shakhs thaa uDaataa rahaa umr bhar mujhe
lekin havaa se haath milaane nahin diyaa

savaal ye nahin mujh se hai kyuun gurezaan vo
savaal ye hai ki kyuun jism o jaan se baahar hai

mohabbatein to faqat intihaaein maangti hain
mohabbaton mein bhalaa e'tidaal kyaa karnaa

sivaa tere har ik shai ko haTaa denaa hai manzar se
aur is ke baa'd khud ko be-sar-o-saamaan karnaa hai

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

tumhein fursat ho duniyaa se to ham se aa ke milnaa
hamaare paas fursat ke sivaa kyaa rah gayaa hai

gham hai na ab khushi hai na ummid hai na yaas
sab se najaat paae zamaane guzar gae

vo na aaegaa hamein maalum thaa is shaam bhi
intizaar us kaa magar kuchh soch kar karte rahe

zamaana mujh se judaa ho gayaa zamaana huaa
rahaa hai ab to bichhaDne ko mujh se tu baaqi

main jis mein rah na sakaa ji-huzuriyon ke sabab
ye aadmi hai usi kaamyaab mausam kaa