vafaa parchhaain ki andhi parastish — Hasan Akbar Kamal

kal yahi bachche samundar ko muqaabil paaeinge
aaj tairaate hain jo kaaghaz ki nannhi kashtiyaan

gae dinon mein ronaa bhi to kitnaa sachchaa thaa
dil halkaa ho jaataa thaa jab ashk bahaane se

baDon ne us ko chhin liyaa hai bachchon se
khabar nahin ab kyaa ho haal khilaune kaa

banaae jaataa thaa main apne haath ko kashkol
so meri ruuh mein khanjar utartaa jaataa thaa

na TuuTe aur kuchh din tujh se rishta is tarah meraa
mujhe barbaad kar de tu magar aahista aahista

diye bujhaati rahi dil bujhaa sake to bujhaae
havaa ke saamne ye imtihaan rakhnaa hai

sabhi se jab mohabbat chaahte ho
mohabbat kyon nahin karte sabhi se

kisi se ishq apnaa kyaa chhupaaein
mohabbat Tapki paDti hai nazar se

sajda-e-ishq pe tanqid na kar ai vaaiz
dekh maathe pe abhi chaand numaayaan hogaa

husn jalva dikhaa gayaa apnaa
ishq baiThaa rahaa udaas kahin

thak gayaa hai dil-e-vahshi miraa fariyaad se bhi
ji bahaltaa nahin ai dost tiri yaad se bhi

ishq udaasi ke paighaam to laataa rahtaa hai din raat
lekin ham ko khush rahne ki aadat bahut ziyaada hai