duniyaa ki ik riit puraani, milnaa aur bichhaDnaa hai — Imam Azam

sankaT ke din the to saae bhi mujh se katraate the
sukh ke din aae to dekho duniyaa mere saath hui

har taraf ik jang kaa maahaul hai 'aazam' yahaan
aadmi ab ghar ke bhi andar salaamat hai kahaan

teri khushbu se moattar hai zamaana saaraa
kaise mumkin hai vo khushbu bhi gulaabon mein mile

kisi ki baat koi bad-gumaan na samjhegaa
zamin kaa dard kabhi aasmaan na samjhegaa

gesu o rukhsaar ki baatein karein
aao mil kar pyaar ki baatein karein

un ke rukhsat kaa vo lamha mujhe yuun lagtaa hai
vaqt naaraaz huaa din bhi Dhalaa ho jaise

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

zamaana mujh se judaa ho gayaa zamaana huaa
rahaa hai ab to bichhaDne ko mujh se tu baaqi

gham hai na ab khushi hai na ummid hai na yaas
sab se najaat paae zamaane guzar gae

tumhein fursat ho duniyaa se to ham se aa ke milnaa
hamaare paas fursat ke sivaa kyaa rah gayaa hai

main jis mein rah na sakaa ji-huzuriyon ke sabab
ye aadmi hai usi kaamyaab mausam kaa

vo na aaegaa hamein maalum thaa is shaam bhi
intizaar us kaa magar kuchh soch kar karte rahe