aTe hue hain faqiron ke pairahan 'kaifi' — Iqbal Kaifi

guhar samjhaa thaa lekin sang niklaa
kisi kaa zarf kitnaa tang niklaa

dekhaa hai mohabbat ko ibaadat ki nazar se
nafrat ke avaamil hamein maayub rahe hain

amn 'kaifi' ho nahin saktaa kabhi
jab talak zulm-o-sitam maujud hai

khizaan kaa daur bhi aataa hai ek din 'kaifi'
sadaa-bahaar kahaan tak darakht rahte hain

phulon kaa tabassum bhi vo pahlaa saa nahin hai
gulshan mein bhi chalti hai havaa aur tarah ki

mohabbaton ko bhi us ne khataa qaraar diyaa
magar ye jurm hamein baar baar karnaa hai

karim jo tujhe denaa hai be-talab de de
faqir huun pa nahin aadat-e-savaal mujhe

ye samajh kar faqiri hi mein hai khudaa
gun hamesha faqiron ke gaate rahe

jazba-e-ishq chaahiye suufi
jo hai afsurda ahl-e-haal nahin

mujh jaise darvesh tumhaari duniyaa mein
marne ki khvaahish mein zinda rahte hain

bhale zamaane mein jis qadar bhi sitam ravaa hon
faqir kaa dar kabhi muqaffal nahin milegaa

marne ke liye aae the ham dasht-e-balaa mein
jiine ki du'aa de gayaa darvesh hamein kyon