gham-e-hayaat ne bakhshe hain saare sannaaTe — Irfan Ahmad

jaane kis shahr mein aabaad hai tu
ham hain barbaad yahaan tere baad

nashsha thaa zindagi kaa sharaabon se tez-tar
ham gir paDe to maut uThaa le gai hamein

akele paar utar ke bahut hai ranj mujhe
main us kaa bojh uThaa kar bhi tair saktaa thaa

ujlat mein aasmaan se aage nikal gayaa
main apne hi makaan se aage nikal gayaa

zakhm jo tu ne diye tujh ko dikhaa to duun magar
paas tere bhi nasihat ke sivaa hai aur kyaa

tark-e-taalluqaat ki bas intihaa na puchh
ab ke to main ne tark kiyaa apne aap ko

gham hai na ab khushi hai na ummid hai na yaas
sab se najaat paae zamaane guzar gae

ye aansu ponchh lijiye aur muskuraaiye
chaara nahin hai koi bhi rukhsat kiye baghair

jab ki pahlu se yaar uThtaa hai
dard be-ikhtiyaar uThtaa hai

husn jalva dikhaa gayaa apnaa
ishq baiThaa rahaa udaas kahin

ham haal to kah sakte hain apnaa pa kahein kyaa
jab vo idhar aate hain to tanhaa nahin aate

main ne apni palkon par gham-kade sajaae hain
aarzu ke maatam mein sogvaar hasti hai