nashsha thaa zindagi kaa sharaabon se tez-tar — Irfan Ahmad

jaane kis shahr mein aabaad hai tu
ham hain barbaad yahaan tere baad

akele paar utar ke bahut hai ranj mujhe
main us kaa bojh uThaa kar bhi tair saktaa thaa

gham-e-hayaat ne bakhshe hain saare sannaaTe
kabhi hamaare bhi pahlu mein dil dhaDaktaa thaa

ujlat mein aasmaan se aage nikal gayaa
main apne hi makaan se aage nikal gayaa

zakhm jo tu ne diye tujh ko dikhaa to duun magar
paas tere bhi nasihat ke sivaa hai aur kyaa

tark-e-taalluqaat ki bas intihaa na puchh
ab ke to main ne tark kiyaa apne aap ko

kam-umri mein sunet hain
mar jaate hain achchhe log

zindagi tu bhi hamein vaise hi ik roz guzaar
jis tarah ham tujhe barson se guzaare hue hain

main tujh se saath bhi to umar bhar kaa chaahtaa thaa
so ab tujh se gilaa bhi umar bhar kaa ho gayaa hai

bichhaDnaa bhi tumhaaraa jite-ji ki maut hai goyaa
use kyaa khaak lutf-e-zindagi jis se judaa tum ho

ye kis maqaam pe laai hai zindagi ham ko
hansi labon pe hai siine mein gham kaa daftar hai

ji chaahtaa hai jiinaa jazbaat ke mutaabiq
haalaat kar rahe hain haalaat ke mutaabiq