aapas ki guftugu mein bhi kaTne lagi zabaan — Jafar Tahir

arsa-e-zulmat-e-hayaat kaTe
ham-nafas muskuraa ki raat kaTe

tujhe bhi dekh liyaa ham ne o khudaa-e-ajal
ki teraa zor chalaa bhi to ahl-e-gham pe chalaa

jab bhi dekhi hai kisi chehre pe ik taaza bahaar
dekh kar main tiri tasvir puraani royaa

ai vatan jab bhi sar-e-dasht koi phuul khilaa
dekh kar tere shahidon ki nishaani royaa

ik umr bhaTakte hue guzri hai junun mein
ab kaun fareb-e-nigah-e-yaar mein aae

'taahir' khudaa ki raah mein dushvaariyaan sahi
ishq-e-butaan mein kaun si aasaaniyaan rahin

jab ki pahlu se yaar uThtaa hai
dard be-ikhtiyaar uThtaa hai

yaar bhi raah ki divaar samajhte hain mujhe
main samajhtaa thaa mire yaar samajhte hain mujhe

dushmanon ki jafaa kaa khauf nahin
doston ki vafaa se Darte hain

is se pahle ki be-vafaa ho jaaein
kyuun na ai dost ham judaa ho jaaein

rafaaqaton kaa miri us ko dhyaan kitnaa thaa
zamin le li magar aasmaan chhoD gayaa

'mir' amdan bhi koi martaa hai
jaan hai to jahaan hai pyaare