ik raat dil-jalon ko ye aish-e-visaal de — Jalal Lakhnavi

main ne puchhaa ki hai kyaa shaghl to hans kar bole
aaj kal ham tere marne ki duaa karte hain

vaada kyuun baar baar karte ho
khud ko be-e'tibaar karte ho

pahunche na vahaan tak ye duaa maang rahaa huun
qaasid ko udhar bhej ke dhyaan aae hai kyaa kyaa

na khauf-e-aah buton ko na Dar hai naalon kaa
baDaa kaleja hai in dil dukhaane vaalon kaa

main jo aayaa ghair se hans kar kahaa us ne 'jalaal'
khatm hai jis par sharaafat vo kamina aa gayaa

gai thi kah ke main laati huun zulf-e-yaar ki bu
phiri to baad-e-sabaa kaa dimaagh bhi na milaa

main baDaa ho gayaa huun magar bachpanaa
mere dil se kabhi bhi gayaa hi nahin

'saif' andaaz-e-bayaan rang badal detaa hai
varna duniyaa mein koi baat nai baat nahin

pahli nazar bhi aap ki uff kis balaa ki thi
ham aaj tak vo choT hain dil par liye hue

charchaa hamaaraa ishq ne kyuun jaa-ba-jaa kiyaa
dil us ko de diyaa to bhalaa kyaa buraa kiyaa

dil ki haalat se khabar deti hai
'asar' aashufta-bayaani meri

surat chhupaaiye kisi surat-parast se
ham dil mein naqsh aap ki tasvir kar chuke