mujhe tanhaai ki aadat hai meri baat chhoDein — Javed Saba

ye jo mahfil mein mire naam se maujud huun main
main nahin huun miraa dhokaa hai koi dekh na le

ye kah ke us ne mujhe makhmase mein Daal diyaa
milaao haath agar vaaqai mohabbat hai

ye jo milaate phirte ho tum har kisi se haath
aisaa na ho ki dhonaa paDe zindagi se haath

guzar rahi thi zindagi guzar rahi hai zindagi
nasheb ke baghair bhi faraaz ke baghair bhi

us ne aavaara-mizaaji ko nayaa moD diyaa
paa-ba-zanjir kiyaa aur mujhe chhoD diyaa

aap se ab kyaa chhupaanaa aap koi ghair hain
ho chukaa huun main kisi kaa aap bhi ho jaaiye

gham hai na ab khushi hai na ummid hai na yaas
sab se najaat paae zamaane guzar gae

husn jalva dikhaa gayaa apnaa
ishq baiThaa rahaa udaas kahin

jab ki pahlu se yaar uThtaa hai
dard be-ikhtiyaar uThtaa hai

aa hi pahunchi ik dariche se shuaa-e-aaftaab
main ye samjhaa thaa shab-e-gham ki sahar koi nahin

jo kah rahe the ki jiinaa muhaal hai tum bin
bichhaD ke mujh se vo do din udaas bhi na rahe

koi rafiq baham hi na ho to kyaa kiije
kabhi kabhi tiraa gham hi na ho to kyaa kiije