ye kah ke us ne mujhe makhmase mein Daal diyaa — Javed Saba

ye jo mahfil mein mire naam se maujud huun main
main nahin huun miraa dhokaa hai koi dekh na le

mujhe tanhaai ki aadat hai meri baat chhoDein
ye liije aap kaa ghar aa gayaa hai haat chhoDein

ye jo milaate phirte ho tum har kisi se haath
aisaa na ho ki dhonaa paDe zindagi se haath

guzar rahi thi zindagi guzar rahi hai zindagi
nasheb ke baghair bhi faraaz ke baghair bhi

us ne aavaara-mizaaji ko nayaa moD diyaa
paa-ba-zanjir kiyaa aur mujhe chhoD diyaa

aap se ab kyaa chhupaanaa aap koi ghair hain
ho chukaa huun main kisi kaa aap bhi ho jaaiye

sabhi se jab mohabbat chaahte ho
mohabbat kyon nahin karte sabhi se

husn jalva dikhaa gayaa apnaa
ishq baiThaa rahaa udaas kahin

ishq thaa aur aqidat se milaa karte the
pahle ham log mohabbat se milaa karte the

khudaa kaa shukr ki aahaT se khvaab TuuT gayaa
main apne ishq mein naakaam hone vaalaa thaa

aisi pyaari shaam mein ji bahlaane ko
paanv nikaale jaa sakte hain chaadar se

pyaar ki jot se ghar ghar hai charaaghaan varna
ek bhi shama na raushan ho havaa ke Dar se