maza to jab hai udaasi ki shaam ho 'shaahin' — Javed Shaheen

kis tarah be-mauj aur khaali ravaani se huaa
be-khabar dariyaa kahaan par apne paani se huaa

samajh rahaa hai zamaana riyaa ke pichhe huun
main ek aur tarah se khudaa ke pichhe huun

thoDaa saa kahin jama bhi rakh dard kaa paani
mausam hai koi khushk saa barsaat se aage

Dubne vaalaa thaa din shaam thi hone vaali
yuun lagaa miri koi chiiz thi khone vaali

kuchh zamaane ki ravish ne sakht mujh ko kar diyaa
aur kuchh bedard main us ko bhulaane se huaa

judaa thi baam se divaar dar akelaa thaa
makin the khud mein magan aur ghar akelaa thaa

gham hai na ab khushi hai na ummid hai na yaas
sab se najaat paae zamaane guzar gae

jab ki pahlu se yaar uThtaa hai
dard be-ikhtiyaar uThtaa hai

husn jalva dikhaa gayaa apnaa
ishq baiThaa rahaa udaas kahin

munh chhupaanaa paDe na dushman se
ai shab-e-gham sahar na ho jaae

ishq jab tak na aas-paas rahaa
husn tanhaa rahaa udaas rahaa

tanhaaiyon mein aati rahi jab bhi us ki yaad
saaya saa ik qarib mire Doltaa rahaa