udaasiyaan hain jo din mein to shab mein tanhaai — Junaid Hazin Lari

qatra na ho to bahr na aae vajud mein
paani ki ek buund samundar se kam nahin

dekhaa nahin vo chaand saa chehraa kai din se
taarik nazar aati hai duniyaa kai din se

vo saadgi mein bhi hai ajab dilkashi liye
is vaaste ham us ki tamannaa mein ji liye

tiri talaash mein nikle to itni duur gae
ki ham se tai na hue faasle judaai ke

ajab bahaar dikhaai lahu ke chhinTon ne
khizaan kaa rang bhi rang-e-bahaar jaisaa thaa

ik sham-e-aarzu ki haqiqat hi kyaa magar
tufaan mein ham charaagh jalaae hue to hain

jab ki pahlu se yaar uThtaa hai
dard be-ikhtiyaar uThtaa hai

gham hai na ab khushi hai na ummid hai na yaas
sab se najaat paae zamaane guzar gae

ishq udaasi ke paighaam to laataa rahtaa hai din raat
lekin ham ko khush rahne ki aadat bahut ziyaada hai

husn jalva dikhaa gayaa apnaa
ishq baiThaa rahaa udaas kahin

kufr-o-islaam ne maqsad ko pahunchne na diyaa
kaaba-o-dair ko sang-e-rah-e-manzil samjhaa

raasta sunsaan thaa to muD ke dekhaa kyuun nahin
mujh ko tanhaa dekh kar us ne pukaaraa kyuun nahin