kahte hain ki uThne ko hai ab rasm-e-mohabbat — Kabir Ajmal

zamir o zehn mein ik sard jang jaari hai
kise shikast duun aur kis pe fath paaun main

vo mere khvaab churaa kar bhi khush nahin 'ajmal'
vo ek khvaab lahu mein jo phail jaanaa thaa

kyuun baam pe aavaazon kaa dhammaal hai 'ajmal'
is ghar pe to aaseb kaa saaya bhi nahin hai

ye gham miraa hai to phir ghair se ilaaqa kyaa
mujhe hi apni tamannaa kaa baar Dhone de

'ajmal' safar mein saath rahin yuun saubatein
jaise ki har sazaa kaa sazaa-vaar main hi thaa

kis se main un kaa Thikaanaa puchhtaa
saamne khaali makaan thaa aur main

sabhi se jab mohabbat chaahte ho
mohabbat kyon nahin karte sabhi se

husn jalva dikhaa gayaa apnaa
ishq baiThaa rahaa udaas kahin

mushkil-e-ishq mein laazim hai tahammul 'saaqib'
baat bigDi hui banti nahin ghabraane se

koi to moajaza aisaa bhi ho apni mohabbat mein
tire inkaar se iqraar ki surat nikal aae

is mohabbat ne hamein joD diyaa aapas mein
varna ham donon kaa ik jaisaa aqida to na thaa

jab kamsin se ishq laDaanaa paDtaa hai
bachchon jaisaa paaTh paDhaanaa paDtaa hai