kis se main un kaa Thikaanaa puchhtaa — Kabir Ajmal

vo mere khvaab churaa kar bhi khush nahin 'ajmal'
vo ek khvaab lahu mein jo phail jaanaa thaa

kyuun baam pe aavaazon kaa dhammaal hai 'ajmal'
is ghar pe to aaseb kaa saaya bhi nahin hai

kahte hain ki uThne ko hai ab rasm-e-mohabbat
aur is ke sivaa koi tamaashaa bhi nahin hai

ye gham miraa hai to phir ghair se ilaaqa kyaa
mujhe hi apni tamannaa kaa baar Dhone de

'ajmal' safar mein saath rahin yuun saubatein
jaise ki har sazaa kaa sazaa-vaar main hi thaa

zamir o zehn mein ik sard jang jaari hai
kise shikast duun aur kis pe fath paaun main

kyon tasavvur mein ji rahaa huun main
jab haqiqat mein mar hi jaanaa hai

apni anaa ki aaj bhi taskin ham ne ki
ji bhar ke us ke husn ki tauhin ham ne ki

vo kuchh muskuraanaa vo kuchh jheinp jaanaa
javaani adaaein sikhaati hain kyaa kyaa

sabhi ke apne masaail sabhi ki apni anaa
pukaarun kis ko jo de saath umr bhar meraa

yaad kyaa aataa hai vo meraa lage jaanaa aur aah
pichhe haT kar us kaa ye kahnaa koi aa jaaegaa

kahaan mumkin hai poshida gham-e-dil kaa asar honaa
labon kaa khushk ho jaanaa bhi hai aankhon kaa tar honaa