ye aansu be-sabab jaari nahin hai — Kaleem Aajiz

daaman pe koi chhinT na khanjar pe koi daagh
tum qatl karo ho ki karaamaat karo ho

zaalim thaa vo aur zulm ki aadat bhi bahut thi
majbur the ham us se mohabbat bhi bahut thi

dard aisaa hai ki ji chaahe hai zinda rahiye
zindagi aisi ki mar jaane ko ji chaahe hai

na jaane ruuTh ke baiThaa hai dil kaa chain kahaan
mile to us ko hamaaraa koi salaam kahe

rakhnaa hai kahin paanv to rakkho ho kahin paanv
chalnaa zaraa aayaa hai to itraae chalo ho

miraa haal puchh ke ham-nashin mire soz-e-dil ko havaa na de
bas yahi duaa main karun huun ab ki ye gham kisi ko khudaa na de

gham hai na ab khushi hai na ummid hai na yaas
sab se najaat paae zamaane guzar gae

jab ki pahlu se yaar uThtaa hai
dard be-ikhtiyaar uThtaa hai

husn jalva dikhaa gayaa apnaa
ishq baiThaa rahaa udaas kahin

duur tak ek khalaa hai so khalaa ke andar
sirf tanhaai ki surat hi nazar aaegi

ham kis ko dikhaate shab-e-furqat ki udaasi
sab khvaab mein the raat ko bedaar hamin the

aur bhi kitne tariqe hain bayaan-e-gham ke
muskuraati hui aankhon ko to pur-nam na karo