vo ik aavaaz thi manzil nahin thi — Kamran Nafees

dil dhaDakne kaa sabab zindagi ho sakti hai
ye zaruri to nahin hai ki tiri yaad hi ho

kal dopahar ko saath rahaa thaa vo der tak
phir us ke baa'd shaam rahi shaam hi rahi

hamaare chaak-e-garebaan kaa taar thaa ye kabhi
ye jis pharere ko nikle hain aap lahraane

ek hi dar thaa gali mein vo bhi darvaaza huaa
jab se har aavaaz par be-kaar mein khulne lagaa

khiDki kaa ye bhaari parda
hijr mein malmal ho jaataa hai

aa jaati hain kuchh khushiyaan andeshon mein
kuchh andeshe khushiyon mein aa jaate hain

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

miri tamannaa hai ab ke tum phir milo to ji bhar ke muskuraaein
ki dekhnaa hai ye raushni kaa safar bahut der baa'd jaa kar

yuun to maujud apne ghar mein hai
aadmi mustaqil safar mein hai

safar mein aise kai marhale bhi aate hain
har ek moD pe kuchh log chhuT jaate hain

yahi bahut the mujhe naan o aab o shama o gul
safar-nazhaad thaa asbaab mukhtasar rakkhaa

gumraah kab kiyaa hai kisi raah ne mujhe
chalne lagaa huun aap hi apne khilaaf mein